Энэ долоо хоногт болж өнгөрсөн TechFest арга хэмжээний үеэр Microsoft Research-ийн программ боловсруулагчид одоогоор боловруулалтын шатандаа байгаа Project Gustav хэмээх төслийн талаар нийтэд танилцууллаа. Ирээдүйд МS Paint программын оронд хэрэглэгдэж болзошгүй энэхүү шинэ аппликацыг ашиглан мониторын дэлгэцнээ жинхэнэ уран зургийн бүтээл бүтээж болно. Учир нь энэхүү программ нь тосон будаг, бийрний ажиллагааг гайхалтай яв цав дууриалган загварчлах чадвартай тул зураачид электрон зотон дээр бүтээл туурвих бололцоо бүрдэж байгаа юм.

 

 

Үй олон нарийн ширхэгтэй үснээс бүрддэг бийрний будах процессийг эдүгээ хүртэл компьютерт тэр хэвээр нь симуляцлан загварчилж чаддаггүй байсан бэрхшээл орчин үеийн график процессорын хүчин чадалд тулгуурлан ажиллах энэ программ гарснаар шийдэгдэх болно.

Project Gustav нь бийрний налалтын өнцөг, даралтын хүч, гарын хөдөлгөөний хурд зэргийг маш дуулгавартай мэдрэх тул зураач хүний бийрийн техник чадварыг компьютер аргаар бүрэн ашиглах бололцоо үүсэх аж. Multitouch технологи дэмждэг энэ програмыг ашиглан компьютерийн сенсор дэлгэц юм уу планшет (tablet) компьютерийн дэлгэцнээ бийр төдийгүй хуруугаараа урлаж болно.

Project Gustav-ийн бас нэг онцлог ялгаа нь "будаг хольж найруулах" чадвар юм. Photoshop гэх мэт уламжлалт график редакторуудад нэг өнгийг өөр өнгөөр "арчих" арга хэрэглэдэг бол шинэ программд өөр өөр өнгө хоорондоо холилдож уусан шинэ өнгө үүсгэдэг байна. Шинэ программ хэрхэн ажилладаг тухай товч видеог YouTube-ээс сонирхоно уу.

 

Сэтгэгдэл

Хайх

3.20 Copyright (C) 2007 Alain Georgette / Copyright (C) 2006 Frantisek Hliva. All rights reserved."