Western Digital компани хатуу дискний зайг илүү оновчтой ашиглаж, багтаамжийг нь сайжруулах Advanced Format хэмээх форматлах шинэ технологи нэвтрүүлж эхлэв.

Хэрэглээнд байгаа хатуу дискүүд нь өгөгдлийг 512 байтийн секторуудад хадгалдаг. Сектор болгон Sync/DAM хэмээх оролтын блокоор эхлэхийн зэрэгцээ ECC буюу алдаа засах кодтой блок агуулдаг тул секторууд хоорондоо завсартай болдог байна. Western Digital энэхүү архитектурыг шинэчлэн сайжруулж 512-ийн оронд илүү том 4096 байт багтаадаг физик сектор ашиглахаар болжээ.

 

Шинэ Advanced Format технологи хэрэглэснээр тус бүрдээ найман Sync/DAM болон ECC блокын оронд ердөө ганц ганц блок ашиглах боломжтой. Үүний дүнд хатуу дискийг хуучин технологиор форматлахад сектор хоорондын завсарт сул үрэгддэг байсан 7-11%-ийн зайг ашигтай талбай болгон хувиргаж байгаа аж.
Мөн шинэ Advanced Format-д илүү урт кодтой ECC блок ашиглаж байгаа тул өгөгдөл хадгалах найдвартай байдал давхар сайжирна.

 

Секторын хэмжээг 512 байтаар тогтоодог стандартыг ашигласаар хэдийнээ 30 гаруй жил өнгөрсөн тул өнөөгийн олон компьютер систем (персональ компьютер, сервер, гар утас!) уян хатан чадвараа хэдийн алдаж, зөвхөн 512 байтын секторт ажилладаг болж хувирчээ. Ийм бүрдэлтэй зохицох чадвартай байлгах үүднээс тус компани Advanced Format технологид 512 байтын секторын эмуляц үүсгэсэн байна.

Advanced Format технологи Windows Vista, Windows 7, Mac OS зэрэг орчин цагийн ихэнх үйлдлийн системд ашиглагдахаар бүтээгдсэн боловч хуучирч буй Windows XP-гийн хувьд төдийлөн оптимал бус. Windows XP ашигладаг хэрэглэгчид зориулан Advanced Format-тай хатуу дискийг хуучин үйлдлийн системд бүрэн хурдаар нь ажиллуулахад зориулагдсан WD Align программ ашиглахыг зөвлөж байна. Уг программыг Western Digital-ийн сайтаас татаж болно.

 

Хатуу дискний соронзон зээрэнхийг үйлдвэрээс нь урьдчилан шинэ форматанд тохируулан үйлдвэрлэж байгаа тул нэгэнт хэрэглээнд байгаа хуучин хатуу дискний firmware-ийг апдэйтлээд дахин форматлах замаар Advanced Format технологийг ашиглах боломжгүй. Одоогийн байдлаар Advanced Format технологийг шинээр гарсан 64 МБ-ийн бүфертэй 1TБ-ийн Caviar Green загвар дэмжиж байна.

Сэтгэгдэл

Хайх

3.20 Copyright (C) 2007 Alain Georgette / Copyright (C) 2006 Frantisek Hliva. All rights reserved."