Энэ удаа бид та бүхэнд зөөврийн ноутбуук компьютерийн батерейны хугацааг хэрхэн уртасгаж болох талаар бяцхан зөвлөгөө бэлдлээ. Мэдээж батерейны үйл ажиллагаа түүний цэнэг хадгалах багтаамжийн тогтоосон хэмжээ, ноутбуукт агуулагдах дотоод эд ангийн хүчин чадлаас шууд хамааралтай боловч хэрэглэгч доорх зөвлөмжүүдийг дагаснаар батерейныхаа ажиллагааг бага ч гэсэн хугацаагаар уртасгах боломжтойг мэдэхэд илүүдэхгүй.

1. Дефрагментлэж байх - Хатуу дискээ та байнга дефрагментлэж байх нь батерейны ажиллагааг уртасгах чухал нөлөөтэй. Учир нь батерей нэлээд иддэг эд ангиудын тоонд хатуу диск зүй ёсоор орно. Диск хэдийчинээ бага ажиллана, төдийчинээ батерейнд хэмнэлттэй. Дискний унших толгой фрагментлэгдсэн өгөгдлийг хайж дискийг удаан хугацаагаар ашиглах ба тэр хэмжээгээр батерейны цэнэг хорогдоно гэсэн үг. Тиймээс дискээ байнга дефрагментлэж доторх тасарсан өгөгдлийг нэгтгэж байх нь бүтээмжийг өсгөөд зогсохгүй эцсийн дүндээ батерейг чинь хэмнэх нь байна. (Мэдээж энэ үйлдлийг үндсэн тэжээлд холбосон үед гүйцэтгэх нь ойлгомжтой!)

Mac OSX үйлдлийн системүүд нь фрагментчлэлийн автомат үйлдлүүдтэй байдаг тул энэ арга Apple системд хамаарахгүй байж болох юм.

Компьютерийг хэсэг хугацаанд ашигласны эцэст анх шинэхэн үйлдлийн систем суулгасны дараах үе шигээ найдвартай түргэн ажиллах нь буурч, үйлдлийн систем "зуурч" эхэлдгийг манай хэрэглэгчид мэдэж байгаа байх. Учир нь үйлдлийн систем байнга давталттай ашиглагдаж байсан файл болон шинээр программ суулгахад шаардагдсан зарим файлуудыг түр хавтсанд хийн хадгалж байдаг.  Хэдийгээр бид шаардлагагүй болсон программаа устгадаг ч уг программ нь устахдаа өөртөө хамааралтай бүх зүйлээ "хамт авч оддоггүй" бөгөөд үйлдлийн системд ямар нэг хэмжээгээр "ул мөрөө" үлдээж орхидог байна.

Ялангуяа интернэт холболтой үед энэхүү хадгалагдсан "хог новшнууд" бүр ч ихсэх нь ойлгомжтой. Цахим хөтөч бүр таны зочилсон цахим хуудсуудыг бүтээж буй зураг, флэш зэрэг өгөгдлүүдийг дараагийн удаа уг хуудсыг түргэн ачаалах үүднээс хэрэглэгчийн компьютер дээр хадгалж орхидог байна. Мэдээж энэ нь таны байнга зочилдог хуудсыг түргэн ачаалахад тустай ч тохиолдлоор ороод гарсан, дахин хэзээ ч орохгүй хуудсуудын мэдээллүүдэд тусаа өгөхгүй эд юм. Эдгээр шаардлагагүй мэдээллүүд нь таны хатуу дискний ашигт зайг бууруулах, үйлдлийн систем тодорхой хэмжээгээр удаан ажиллахад зарим талаар нөлөөлж эхэлнэ. Тиймээс хэрэглэгч бүр зарим үед эдгээр хэрэггүй зүйлүүдээсээ салж үйлдлийн системээ цэвэрлэж байх нь чухал.

Бидний ихэнхийн маань хэрэглэдэг Windows ХР үйлдлийн систем өөрийн Disk Defragmenter хэрэглүүртэй. Программ, тоглоом, дуу, зураг зэрэг ямар ч файлыг компьютерт суулгах үед үйлдлийн систем өгөгдлийг хатуу дискэндэх хамгийн эхний сул блок "нүхнээс" эхлүүлэн байршуулж эхэлдэг. Хэрэв таны үйлдлийн систем дөнгөж шинээр суусан эсвэл өгөгдөл хуулж буй хатуу диск чинь шинэ, хоосон байсан бол өгөгдөл хоорондоо тасралтгүй залгаа байдалтайгаар байршина.

Харин эсрэгээр үйлдлийн систем болон хатуу диск хэрэглээд нэлээд удсан, өмнө нь олон удаа өгөгдөл бичиж устгаж байсан тохиолдолд өгөгдлүүд хоорондоо тасарсан, "хамт байх" магадлал буурах болно. Ийнхүү удаан хэрэглэгдэж өмнө нь олон удаа өгөгдөл бичиж устгаж байсан систем, хатуу дискийн ажиллагааны хурд удаашрах нь элбэг. Учир нь нэгэнт хоорондоо залгаатай бус байрласан өгөгдлүүдийг хатуу дискний уншигч толгой эрж хайн илүү гүйлт хийж цаг алдаж байна гэсэн үг. Нэг үгээр хэлбэл хатуу дискэнд фрагмент буюу тасархай өгөгдлүүд үүсэж байгаа юм.