Программ хангамжийн “мангас” Microsoft-ийн зургийн аппарат хийж эхлэсэн шалтгаан нь түүний онлайн газрын зургийн үйлчилгээ нэвтрүүлж эхэлсэнтэй салшгүй холбоотой. Google Maps болон Microsoft-ийн Live Maps зэрэг интернэт суурилсан онлайн газрын зургийн үйлчилгээнүүдэд  маш өндөр нягтшилтай чанар сайтай зураг шаардагдах нь гарцаагүй.

Эдгээр үйлчилгээнд оrto-photography буюу агаараас авсан зургуудийг ашигладаг бөгөөд зургийг өндөр үнэ бүхий ultra-high нягтшилтай камериудыг онгоцонд суурилуулан авах маягаар олж авдаг аж. Агаараас авсан зураг дараа нь боловсруулагдаж хоорондоо “залгагдан” өгөгдлийн төв рүү шилжинэ. Тэндээс та бидний хөтөч дотор байх Live Maps мэтийн газрын зургийн үйлчилгээ нь таны үзэхийг хүссэн солбицол бүхий газрын зургийг компьютерийн дэлгэцийн дүрслэлийн хэмжээ, ойртуулалтын түвшинд тохируулан гаргадаг аж.

Microsoft-ийн хувьд зургийн аппарат хөгжүүлж эхэлсэн түүх нь Aвстрид төвтэй Vexcel Imaging компанийг худалдан авснаас эхтэй. Microsoft нь анх Live Maps газрын зургийн Bird's Eye view-гийн зураг авахад зориулж өндөр нягтшилтай агаарын зургийн камериудыг бүтээж эхэлжээ. Ингээд 64 сая цэгшилийн нягтшилтай зураг авах UltraCamL загвар, 92 сая цэгшил, 11704 x 7920 хэмжээний натив дүрслэлийн нягтшилтай UltraCamLp зургийн аппаратууд зохиогджээ.

Өнгөрсөн хугацаанд олон олон үйлдвэрлэгчид өөрсдийн D-SLR төрлийн мэргэжлийн дижитал зургийн аппаратуудыг хэрэглэгчдэд танилцуулаад байгаа билээ. Жишээ нь Canon саяхан DIGIC 4 дүрс боловсруулах процессор, 15.1 мегапиксель нягтшил, секундэд 6.3 дүрс бичих чадал бүхий 3” Live View LCD дэлгэцтэй EOS 50D D-SLR фото аппаратыг угсарсан бол Nikon хэрэглэгчдийн дуртай D80 загвараа D90 загвараар сайжруулсан байна. D90-ийн хувьд дүрс мэдрэгч, дүрс боловсруулагч EXPEED технологи бүхий 12.3 мегапиксель нягтшил дэмжиж чадах болжээ. Уг камерын гол онцлог нь өндөр нягтшилт 720p HD movie горимоор бичлэг хийх боломжтой болсон явдал юм.