Гибрид буюу цахилгаан болон дотоод шаталтат хос хөдөлгүүр бүхий суудлын тэрэгнүүд өнөө үед автомашин үйлдвэрлэгчдийн хөгжүүлж буй голлох бүтээгдэхүүний нэг болсныг Toyota Prius-аас эхтэй гибрид машинуудын давалгаа бэлээхэн нотолно. Автомашин үйлдвэрлэгч “толгойтой” бүхэн дэлхий нийтийг хамарч буй дулаарлыг бууруулах үйлсэд тус тусын хувь нэмрийг оруулахаар шамдаж буй энэ үед бидний сайн мэдэх Өмнөд Солонгосын Hyundai корпораци нь Sonata Hybrid болон Sonata Turbo хэмээх хос хөдөлгүүртэй тэрэгнүүдээ зах зээлд гаргахаар албан ёсоор танилцуулж байна.

^{Sonata Hybrid}

Английн суперкар үйлдвэрлэгч Астон Мартин компани а-ля Смарт маягийн бяцхан тэрэг үйлдвэрлэх ажилд ханцуй шамлан орлоо. Одоогоор дизайны төслийн эхний шатандаа байгаа уг загварыг Тоёота компанитай хамтран бүтээх бөгөөд өнгөрөгч оны сүүлээр худалдаанд гарсан гурван хаалгат хэчбэк - Тоёота iQ машины бааз дээр суурилах аж.

Дээд ангилалын өндөр үнэтэй спорт автомашин үйлдвэрлэгч гэнэт сити-кар бүтээх болсон шалтгааныг тус компаний төлөөлөгч: "Үйлчлүүлэгчдийн олонх маань гараашдаа хоёр, гурав, дөрвөн ч тэрэгтэй байна. Эдгээрээс дор хаяж нэг нь жижиг оврын машин байгааг бид судалгаагаар олж мэдлээ" хэмээн тайлбарлажээ.

Германы BMW компани ирэх 9 сараас эхлэн шинэ загваруудаа Voice Control System хэмээх дуут удирдлагын сайжруулсан системээр тоноглохоор боллоо. Шинэ систем нь БМВ автомашины нэмэлт (optional) тоноглол - Professional Navigation System-д багтаж зарагдах юм. Дуут удирдлагын систем хэрэглэснээр удирдлагын цэсэнд хот, гудамжны нэр хаяг, дугаарыг гараар оруулалгүйгээр, шууд хэлж өгөхөд навигацийн систем маршрутаа өөрөө гаргана.

Ford Motor Company бүтээгдэхүүндээ жолооч нар осол аваар гарахаас урьдчилан сэргийлэх шинэ технологийг нэвтрүүлэх тал дээр бусдыг тэргүүлэн ажиллаж байна. Бидний хэрэглэж буй ихэнх автомашинууд жолоочийн амь насыг хамгаалах хийн дэртэй үйлдвэрлэгдэж байгаа боловч Ford-ийн шинэ технологи нь жолоочийг хамгаалаад зогсохгүй өндөр үнэтэй тансаг зэрэглэлийн автомашинуудыг эвдрэл, гэмтлээс хамгаалах зориулалттай юм байна.