Глобал дулаарлыг саатуулан удаашруулахын тулд хүний үйл ажиллагаанаас шалтгаалан агаар мандалд ялгарч байгаа нүүрсхүчлийн хийн хэмжээг багасгах талаар улам бүр идэвхтэй арга хэмжээ авах боллоо. Цахилгаан хэрэгсэлд янз бүр цахилгаан хэмнэлтийн технологи эрчимтэй нэвтрүүлж, нефтийн бүтээгдэхүүн бага хэрэглэдэг гибрид болон цахилгаан автомашинууд агаар мандалд ердийн автомашиныг бодвол хорт бодис бага ялгаруулж, шатахуун идэмхий автомашины хэрэглээ тогтвортой буурч байна.

Компьютерийн хэрэглээнд ч дээрхийн нэгэн адил цахилгааны үр ашигтай, хэмнэлттэй хэрэглээ үүсгэхтэй холбогдсон арга хэмжээ байнга авч байгаа юм. Компьютер бүрдэл, эд ангиудад хожим нь хаягдах тохиолдолд хүрээлэн буй орчныг бохирдуулах бодис ашиглахаа больж, процессор болон видеокартанд цахилгаан хэмнэлтийн ажлын горим үүсгэх болов.

АНУ-д ашигт үйлийн коэффициент сайтай тэжээлийн блок ашигладаг компьютер болон өгөгдлийн серверүүдийг сертификатжуулах 80 Plus хэмээх хөтөлбөр анх хэрэгжиж эхэлсэн юм. Уг хөтөлбөрийн дагуу PFC (Power Factor Correction) буюу чадлын коэффициентийн коррекцтой, ханын цахилгааны суурь залгуураас авч байгаа өндөр хүчдлийн хувьсах гүйдлийг компьютер машинд зориулагдсан нам хүчдлийн тогтмол гүйдэл болгохдоо доод тал нь 80 хувийн ашигт үйлийн коэффициенттэй тэжээлийн блоконд 80 Plus сертификат олгодог болжээ. Сертификатын дагуу тэжээлийн блок хөнгөн, хагас болон бүрэн ачаалалтай үедээ 80%-иас доошгүй АҮК-той байх ёстой. Эдүгээ 80 Plus сертификаттай бүтээгдэхүүнд дэсктоп болон сервер компьютерээс авахуулаад өгөгдөл боловсруулах төвийн аппликац хүртэл хамардаг болоод байна.  

Одоогоос хэдхэн жилийн өмнө хэрэглэгчдийн шинэ компьютер авахдаа анхаардаг гол хэмжүүр нь процессорын хурд буюу гигагерц байдаг байсан бол өнөөдөр энэ бүхэн өөрчлөгдсөн болохыг та бүхэн мэдэж байгаа байх. Системийн төв процессор үйлдвэрлэгчдийн Мурын хуульд суурилсан “Гигагерц” өрсөлдөөн эцэстээ мухардалд орж процессорын архитектур илүү ухаалаг, бүтээмж өндөртэй байх шаардлага төрснөөр загварын нэршилгээ ч дан ганц гигагерц хэмжүүрт тулгуурлахаа болиж, элдвийн тоо үсэг нэртэй холилдсон загварууд хэрэглэгчдийн толгойг эргүүлж эхлэх болсон билээ.

Өнөөдрийн энэ график болон интернэт технологийн хурдтай хөгжил ачаалал, хэмжээ ихтэй медиа өгөгдлүүд нь системийн төв процессороор зогсохгүй график карт, санах ой, хатуу диск гэх мэт компьютерийн бусад эд ангиудыг хүртэл дээрх хэрэгцээг хангахуйц түвшинд техникийн үзүүлэлттэй байхыг шаардах болсон нь ойлгомжтой. Энэхүү хэрэгцээг хангахуйц хэмжээний чадалтай компьютерийг хэрэглэгч худалдан авахад ойлгомжтой болгох зорилгоор AMD нь AMD Vision хэмээх маркетингийн хөтөлбөрийг хэрэгжүүлэхээр бэлтгэж байгаа юм байна.

Intel процессортой олон цөмт дэсктоп системийн тухай хоорондоо зөрөөтэй мэдээлэл гарч байгаа. Нэг талаас LGA 1366 платформ, Intel X58 чипсетэд зориулсан 32 нм-ийн 6 цөмт Gulftown процессор 2010 оны эхний хагаст гарах ёстой. Нөгөө талаас зарим интернэт эх сурвалжид найман цөмт Nehalem-EX процессорыг үнэтэй дэсктоп системд ашиглах талаар бичиж байна.