Google-ийн хятадын салбарын захирал агсан Ли Кайфү (Lee Kai Fu - 李开复) олныг хүлээлгэж буй сонирхолтой бүтээгдэхүүн - Apple компаний шинэ планшет компьютерийн (tablet pc) талаар зарим зүйлсийг хятад хэл дээрх блогдоо толилууллаа. Ли Кайфү нь Google-ийн захирлын албанаасаа өмнө Apple-д ажиллаж байсан төдийгүй Apple-ийн гэрээт үйлдвэрлэгчийн нэг Foxconn компанитай нягт харилцаатай нэгэн тул мэдээлэл нь илүү итгэл төрүүлэхүйц юм.

Өнгөрсөн жилээс компьютер үйлдвэрлэлийн салбарт нэтбуук хэмээх хөнгөн, бяцхан зөөврийн компьютерүүд олноор хүч түрэн орж ирж, хэрэглэгчдийн сонирхлыг ихээр татах болсон. Анх 7 инч дэлгэцийн хэмжээтэй үйлдвэрлэгдэж “амьдралынхаа” гараагаа эхэлж байсан “жижигхэн” гар компьютерүүд нь түүхэн хөгжлийнхөө 8, 9, 10 инч дэлгэцийн хэмжээ бүхий үе шатуудыг даван туулсаар аль хэдийнээ 11 инч дэлгэцийн хэмжээнд хүртлээ “томорчихоод” байгаа буюу бага оврын ердийн ноутбуук компьютерийн хэмжээнд хүртлээ “өсөхөд” ердөө нэг хуруу (инч) л дутчихаад байгаа аж.

Харин эдгээр бяцхан нэтбуукуудын батерей нь хэр урт хугацаанд хуримтлуулсан цэнэгээрээ тасралтгүй ажиллаж чадах эсэх нь амьдралын “мобайл” хэв маягтай  хэрэглэгчдийн хувьд ихээхэн чухал асуудал. Магадгүй техникийн үзүүлэлт нь доогуур тул харьцангуй урт хугацаанд цэнэгээрээ ажиллаж чадна эсвэл хүчин чадал, овор хэмжээ багатай батерейтэй тохиолдолд цэнэгээр удаан ажиллаж гавихгүй нь тодорхой.