Intel Nehalem архитектурт шилжих ажиллагаа жил гаруй үргэлжилж байна. LGA 1366 контакт суурьтай Core i7 анхны процессорууд 2008 оны намар гарчээ. Үүнээс хойш бараг жилийн дараа 2009 оны 9 сард Lynnfield цөм, LGA 1156 контакт суурьтай Core i5, Core i7  дөрвөлсөн цөмт процессоруудаар хүрээгээ тэлсэн. Харин 1 сарын 3-наас шинэ микроархитектурт шилжих сүүлчийн шат эхэллээ.

Энэ удаа 84-284 долларын үнэ бүхий долоон процессор шинээр гарч байна. Clarkdale цөмд суурилсан энэ удаагийн процессорууд Hyper-Threading дэмждэг хос цөм, 4МБ-ийн хэмжээтэй гуравдагч түвшний кэш, график цөм, санах ойн хос сувагт контроллер болон PCI Express түгээгүүрийн контроллертой. Шинэ процессорын цөм хос кристалл бүхий савлагаатай. Үүний 32 нм-ийн технологийн процессоор үйлдвэрлэгдсэн арай жижиг кристаллд процессорын хос цөм, гуравдагч түвшний кэш болон QPI түгээгүүрийн контроллер байрлаж байгаа. Харин бусад контроллерууд 45 нм-ийн технологийн процессоор үйлдвэрлэсэн арай том кристаллд байрлана.

 

Intel корпорац 4 МБ-ийн кэш, Hyper-Threadiing, хос сувагт DDR3 санах ойн контроллер, нэгтгэмэл график цөм бүхий Clarkdale код нэртэй 32 нм-ийн хос цөмт микропроцессорыг мэйнстрим дэсктоп компьютерийн зориулалттай нийлүүлнэ. Энэхүү Clarkdale нь Westmere код нэртэй микроархитектурт суурилдаг юм. 

AMD компани Intel Core i7-той сөргөцүүлэн дөрвөн цөмт нэн хурдан процессор гаргах бодолгүй байгаа мэт. Гэхдээ х86 чипний дэлхийн хоёрдахь том үйлдвэрлэгчид дээд ангилалын дэсктоп болон ажлын станцын зах зээлд хүчтэй өрсөлдөгч болж чадахаар хангалттай өндөр давтамжид ажиллах чадвартай зургаан цөмт микропроцессор байгаа.

Өнгөрөгч онд гарсан эх сурвалжид Advanced Micro Devices компани 2009 оны дундуур хурд чухалчилдаг үйлчлүүлэгчдэд зориулсан, өсгөсөн хурдат AMD Phenom II FX микропроцессор гаргах гэж байгаа тухай бичиж байлаа. AMD одоохондоо иймэрхүү чип хараахан гаргаж амжаагүй ч AMD Phenom брэндийн нэрийг өргөж аварга амжилт тогтоох учиртай, "мэргэжлийн" оверклокчдод зориулсан AMD Phenom II Black Edition TWKR хэмээх микропроцессорыг гар аргаар түүвэрлэж бэлтгэхээр болсон юм. Урьд гарсан мэдээнд өгүүлсэнчлэн TWKR процессор нь арилжааны зориулалтаар борлуулагдахгүй. Тэгэхлээр дөрвөн цөмт хурдан процессор гаргахгүй ч гэсэн зургаан цөмт төв процессор (CPU) гаргах хэрэгтэй юм биш үү?

 

Процессор оверклоклох урлаг компьютер сонирхогчид төдийгүй процессор үйлдвэрлэгчдэд чухал ач холбогдолтойд тооцогдож байгааг батлах мэдээ өдөр ирэх тутам нэмэгдэж байна. AMD компани шингэн гелий ашиглан процессор оверклоклож туршсан тухай урьд нь мэдээлсэн.

Давтамжийн рекорд тогтоох зорилготой ийм төрлийн оверклоклолтонд хөргөлтийн онцгой арга хэрэгсэл чухал төдийгүй, хэрэглэгдэж буй процессор шигшмэл сайн эд байх шаардлагатай.

 

Оверклокийн аварга амжилт AMD-д оногддог явдалд цэг тавих зорилгоор Intel компани давтамжийн өсөх нөөц үнэмлэхүй сайтай мянган ширхэг Core i7-975 Extreme Edition (3.33ГГц) процессор нарийвчлан түүвэрлэж цуглуулжээ. Энэхүү "шигшмэл" цуглуулгыг оверклокингийн тусгай арга хэмжээнд зориулахаас гадна мэргэшсэн нэр хүндтэй оверклокеруудад тараах юм.