Microsoft-ийн Windows 7 үйлдлийн систем гараад дөнгөж 2 сар орчим болж байгаа ч хэрэглэгчдийн тоо хурдтай өссөөр хэдийнээ зах зээлийн 4 хувийг даваад байна. ОЕМ шугмаар борлогдож байгаа шинэ компьютер системүүдэд 4 ГБ-ийн шуурхай санах ой тавих нь нэгэнт стандарт болсон тул санах ойг бүрэн хаяглахын тул хэрэглэгчид 64 битийн верс ашиглах нь их боллоо. Харин корпоратив хэрэглэгчдийн хувьд байдал эсрэгээр.

Албан газар, компаний IT салбар консерватив хандлагатай байдаг болохоор шинэ үйлдлийн систем хэрэглэж эхлэхийн урьдаар анхны Service Pack гарахыг нь хүлээдэгт гайхах зүйлгүй. Байдал ийм хэдий ч Gartner компаний шинжээчид Windows XP юм уу Vista-гаас Windows 7 руу "апгрэйд" хийхээр төлөвлөж буй IT салбарын удирдлагуудад 64 битийн верс сонгохыг зөвлөж байна. Шинжээчдийн үзэж байгаагаар 32-оос 64 битийн системд шилжилт хийх хамгийн тохиромжтой үе нь чухамхүү шинэ үйлдлийн систем рүү шилжих үе юм. 2014 он гэхэд нийт корпоратив хэрэглээний персональ компьютерийн 75%-д нь Windows-ийн 64 битийн верс ажиллаж байх болно хэмээн Gartner-ийн судалгаанд тооцоолсон байна.

Глобал дулаарлыг саатуулан удаашруулахын тулд хүний үйл ажиллагаанаас шалтгаалан агаар мандалд ялгарч байгаа нүүрсхүчлийн хийн хэмжээг багасгах талаар улам бүр идэвхтэй арга хэмжээ авах боллоо. Цахилгаан хэрэгсэлд янз бүр цахилгаан хэмнэлтийн технологи эрчимтэй нэвтрүүлж, нефтийн бүтээгдэхүүн бага хэрэглэдэг гибрид болон цахилгаан автомашинууд агаар мандалд ердийн автомашиныг бодвол хорт бодис бага ялгаруулж, шатахуун идэмхий автомашины хэрэглээ тогтвортой буурч байна.

Компьютерийн хэрэглээнд ч дээрхийн нэгэн адил цахилгааны үр ашигтай, хэмнэлттэй хэрэглээ үүсгэхтэй холбогдсон арга хэмжээ байнга авч байгаа юм. Компьютер бүрдэл, эд ангиудад хожим нь хаягдах тохиолдолд хүрээлэн буй орчныг бохирдуулах бодис ашиглахаа больж, процессор болон видеокартанд цахилгаан хэмнэлтийн ажлын горим үүсгэх болов.

АНУ-д ашигт үйлийн коэффициент сайтай тэжээлийн блок ашигладаг компьютер болон өгөгдлийн серверүүдийг сертификатжуулах 80 Plus хэмээх хөтөлбөр анх хэрэгжиж эхэлсэн юм. Уг хөтөлбөрийн дагуу PFC (Power Factor Correction) буюу чадлын коэффициентийн коррекцтой, ханын цахилгааны суурь залгуураас авч байгаа өндөр хүчдлийн хувьсах гүйдлийг компьютер машинд зориулагдсан нам хүчдлийн тогтмол гүйдэл болгохдоо доод тал нь 80 хувийн ашигт үйлийн коэффициенттэй тэжээлийн блоконд 80 Plus сертификат олгодог болжээ. Сертификатын дагуу тэжээлийн блок хөнгөн, хагас болон бүрэн ачаалалтай үедээ 80%-иас доошгүй АҮК-той байх ёстой. Эдүгээ 80 Plus сертификаттай бүтээгдэхүүнд дэсктоп болон сервер компьютерээс авахуулаад өгөгдөл боловсруулах төвийн аппликац хүртэл хамардаг болоод байна.