Хос процессор бүхий гэйминг зориулалттай Skulltrail дэсктоп платформ дахин сэргэх тухай интернэтээр яригдаад багагүй хугацаа өнгөрлөө. Энэ оны 1 сарын эцэст EVGA компани хос LGA 1366 суурьтай Intel 5520 чипсет бүхий эх хавтангийн загвар танилцуулсан. Тухайн үед ийм эх хавтанд нэг дор 32 нм-ийн зургаан цөмт хос Core i7-980X Extreme Edition процессор ажиллаж чадна хэмээн тооцоолж байлаа.

Энэ удаа Intel компани 32 нм-ийн Xeon 5600 цувралын процессор шинээр гаргасантай холбоотойгоор EVGA компани LGA 1366 хийцтэй Xeon 5600, Xeon 5500 цувралын хос процессор дэмждэг Classified SR-2 эх хавтан бүтээлээ.

 

Windows XP үйлдлийн систем хэрэглээний тархац болон хугацаагаараа Microsoft-ийн бүтээгдэхүүн дотор үнэмлэхүй аварга хэвээрээ байна. Хатуу дискний гол үйлдвэрлэгчид ирэх оноос эхлэн Western Digital компаний "advanced format" хэмээх шинэ форматыг бүтээгдэхүүндээ нэвтрүүлэхээр шийдсэнтэй холбоотойгоор Windows XP үйлдлийн систем хэрэглэгчдийн тоо эрс буурч болзошгүй. Шинэ форматын дагуу соронзонт дискний физик секторын хэмжээ 512 байтаас 4 килобайт болж өсөх юм.